Myndir á spjalli - leiðbeiningar

skipio

Eitt það algengasta sem fólk virðist lenda í veseni með er hvernig setja skuli myndir á spjallið hér á ljosmyndakeppni.is.
Slíkt er í raun þræleinfalt - það helsta sem ber að athuga er að myndir sem viljum setja á spjallið þurfa að vera þegar staðsettar á vefþjóni á netinu (nánar að því síðar hvernig við komum mynd á vefþjón).
Í stuttu máli berum við okkur svona að við að pósta myndum á spjallið:

1. Þegar við sendum inn nýjan póst á spjallið höfum við nokkra hnappa fyrir ofan textaboxið sem við skrifum sjálfan póstinn í. Einn af þessum hnöppum heitir Img.

2. Til að setja inn mynd smellum við einfaldlega á Img hnappinn einu sinni.
Við það að smella á hnappinn breytist hann í Img* og textinn [img] kemur aftast í textasvæðinu. Slóðina að myndinni okkar getum við svo skrifað beint fyrir aftan [img] í textasvæðinu líkt og er á myndinni hér að neðan.

4. Þegar við höfum slegið inn slóðina að myndinni smellum við svo aftur á Img* hnappinn og bætist þá textinn [/img] við aftast í textanum og Img hnappurinn breytist aftur til fyrra horfs.

Við sjáum að útkoman er semsagt þannig að til að mynd birtist á spjallinu þarf að vera [img] og [/img] utan um slóðina að myndinni.
(Það má líka minnast á að það er þessvegna hægt að slá inn [img] sjálfur í stað þess að nota Img-hnappinn.)

Eins og fyrr segir þurfa myndir að vera þegar til staðar á vefþjóni til að hægt sé að pósta þeim á spjallið. Til að komast að því hver er slóðin að mynd á vefsíðu er hægt að smella með hægri hnappnum á myndina í vefráparanum og smella á Properties. Þá fáum við upp glugga eins og að neðan:

Hér er best að velja með músinni slóðina sem stendur fyrir aftan Address, smella á valda textann með hægri músarhnappum og velja Copy. Hægt er að framkalla textann annars staðar með því að hægrismella á textasvæði og smella á Paste. (Þ.e.a.s. við myndum gera Paste fyrir aftan [img] þegar við erum að setja skilaboð á spjallið.)

ATH: Til þess að hægt sé að pósta myndum á spjallið þarf slóðin að þeim að enda á .jpg, .jpeg, .gif eða .png. Ef slóðin endar ekki á þessum viðskeytum birtist myndin ekki á spjallinu.

Aðal vesenið sem margir eiga við að etja er hvar hægt er að geyma sjálfar myndirnar á vefnum. Hér eru nokkrar tillögur:

Margar netveitur bjóða upp á vistun fyrir þá sem hafa netáskrift hjá þeim. Þetta er til dæmis í boði fyrir áskrifendur hjá Símanum og Og Vodafone. Venjulega þarf að hafa samband við netveituna til að virkja vefsvæðið.
Hægt er að fá ókeypis vistun á ljósmyndum á fjölmörgum stöðum á netinu. Margir fá sér til dæmis aðgang á nulleinn.is en þar er hægt að halda úti nk. dagbók og geyma myndir í henni sem aftur er hægt að vísa í úr spjallinu. Á photo.net er einnig boðið upp á vista nokkrar myndir á án endurgjalds og loks má minnast á albumtown.com sem eitt af fjölmörgum ókeypis vefalbúmum.
Eflaust munu einhverjir minnast á fleiri ókeypis vefalbúm hér að neðan. Það ber hinsvegar að hafa sérstaklega í huga að til að hægt sé að birta myndir hér á spjallinu verða myndirnar í albúminu að enda á .jpg, .jpeg o.s.frv og eins verður að vera opið fyrir að hægt sé að vísa á myndina utanfrá. Þetta er því miður ekki þannig hjá ýmsum aðilum, t.d. Yahoo.
Nokkur fyrirtæki bjóða einnig upp á hýsingu á vefalbúmum gegn vægu gjaldi. Þarna er maður oft að fá meira geymslurými, fleiri möguleika, þægilegra viðmót (t.d. hægt að setja inn margar myndir í einu með zip skrá) og svo aukið öryggi (ólíklegra að fyrirtækið fari á hausinn eða eyði myndum úr albúmum). Tveir vinsælir staðir eru pbase (ársáskrift kostar $23) og smugsmug (árið á $29,95). Hægt er fá „trial“-áskrift í stuttan tíma hjá báðum þessum fyrirtækjum. dpchallenge býður líka upp á þann möguleika að vista albúm en ársáskrift hjá þeim kostar $25 fyrir árið.